Bundant 20% dapli che fin uss duai la purschida da bus en Engiadin’Ota vegnir engrondida. La finamira da quest schlargiament da la purschida duai esser, tenor l’uniun da vischnancas per il traffic public d’Engiadin’Ota, in meglier access per Silvaplana, Segl, Malögia e Puntraschigna.
Colliaziuns pli directas e pli sveltas
Era per il rest dals passagiers e da las passagieras duain las mesiras planisadas purtar meglieraments. Las lingias da bus duain daventar pli directas, uschia ch'igl è pussibel d’arrivar a la destinaziun senza avair da midar tranter ils bus uschè savens sco per il mument. Era la lingia da bus da San Murezzan a Chiavenna en l'Italia duai vegnir pli directa. Uschia ch'il viadi da l’Engiadin’Ota a Milano duai sa reducir per radund 50 minutas.