Adina dapli persunas dumondan per ina reducziun da premias. L'onn passà eran quai 19'000 persunas che han fatg quai per l'emprima giada – uschè blers sco ils ultims 10 onns betg. Persunas che na pon betg pajar ils cnap 360 francs – tant sco che la cassa da malsauns custa en media per mais – dumondan per sustegn. Quai mussan retschertgas dal schurnal regiunal da SRF. In motiv che pliras persunas han dumandà è, che la Confederaziun ha annunzià che las premias s'augmentian. En il Grischun n'è la chargia da premias betg uschè auta sco en il rest da la Svizra. Dentant survegn ina gronda part da la populaziun tuttina ina reducziun, uschia il directur da la SVA grischuna, Urs Grischott.
Passa 64'000 persunas dal Grischun vegnan en il plaschair da la reducziun da premias. Quai èn 32% da la populaziun grischuna.
En tut ha la segiranza sociala pajà 115 milliuns francs, quai èn 8% dapli che l'onn passà. Passa 60% dals custs surpiglia la Confederaziun. Il chantun Grischun fa dentant era per il proxim onn quint da pajar dapli reducziuns da premias, uschia èsi almain budgetà.
