La cumissiun da concurrenza (WEKO) ha preschentà il rapport annual a Berna: ella ha fatg 27 examinaziuns ed ha instradà 17 scleriments preliminars l'onn passà. Controllà ed intervegnì ha la WEKO tranter auter en ils secturs da construcziun, d'energia, da finanzas e da telecommunicaziun. A Berna ha ella accentuà l’impurtanza da la lescha da cartel per l’economia publica da la Svizra.
La WEKO ha franà la Swisscom
Intervegnì sin moda clera ha la WEKO per exempel l'onn passà cunter la Swisscom. Ella ha pretendì tenor ina communicaziun che la Swisscom midia l’architectura da la rait da fibras da vaider fin 2025. Il 2020 aveva la Swisscom numnadamain midà strategia: enstagl da metter cabels cun silmain quatter fibras che mainan da la centrala da telefon enfin tar las chasadas ha ella mo pli mess cabels cun ina fibra.
Quai impedeschia tenor la WEKO autras interpresas da porscher lur servetschs. Plinavant cuntanschia la Swisscom uschia ina posiziun da monopol. Pervi dal squitsch da la WEKO ha il concern da telecommunicaziun decis il 2022 da puspè metter cabels cun almain quatter fibras da vaider. Tuttina pretenda la WEKO uss in chasti da 18 milliuns francs da la Swisscom. Tenor la WEKO avess la Swisscom numnadamain betg midà l’architectura da la rait da fibras senza intervenziun.