L'anteriur deposit da muniziun en la Part Sura Bernaisa duai vegnir rumì. Quai pervi dal privel d'explosiun che deriva da l'anteriur deposit da muniziun. Uss datti dentant in nov quità: La rumida dal deposit da muniziun pudess liberar substanzas nuschaivlas. La dumonda è pia co proteger l'ambient ed il persunal che duai rumir il deposit. Quai ha il manader da project, Adrian Goetsch, ditg envers SRF.
Il risico da substanzas nuschaivlas – e che l'ambient pudess vegnir contaminà – vegnan ad esser grondas sfidas.
Tenor Goetsch haja en il material sutteran blers metals grevs sco argient viv, antimon e zinc. La Confederaziun lavura perquai ensemen cun ina deponia da rument spezial per chattar schliaziuns adattadas.
In project da 25 onns
L'onn passà ha il Cussegl federal approvà in credit da 2,6 milliardas francs per la rumiada dal deposit da muniziun. Il deposit cun ses materials explosivs saja in privel per la populaziun. Cun la rumida vul il Cussegl federal porscher a la populaziun da Mitholz ina basa per in avegnir segir ed attractiv, scriva el en ina communicaziun.
Il project duai durar radund 25 onns, il credit da radund 2,6 milliardas francs duai vegnir pajà durant quel temp en dus transchas. Tenor ina valitaziun dal Departament federal da defensiun ston 50 persunas bandunar lur chasas per var 10 onns. Las emprimas persunas duain bandunar lur chasas il 2025, las autras en il 2030 cur che la rumida duai cumenzar.
