Suenter Lugano èsi era gartegià a Servette da sa qualifitgar per il final da la 99avla cuppa svizra. Ils Genevrins han battì en il mezfinal Winterthur cun 1:0. Il mezfinal ha gì lieu sin la Schützenwiese a Winterthur. Il gol decisiv ha fatg Timothé Cognat en la 88avla minuta.
Lugano aveva gudagnà ses mezfinal gia avant cunter Sion cun 2:0. Il final da la cuppa svizra è ils 2 da zercladur a Berna.
Scenas selvadias suenter la fin dal gieu
Cura che la partida era a fin èn plirs fans da Servette curì sin la plazza da ballape ed han bittà faclas sin ils fans da Winterthur ch'eran sin tribuna. Sinaquai èn lura plirs fans da Winterthur curì sin la plazza da ballape. Suenter tumults han lura ils giugaders da Servette pudì manar enavos lur fans en il sectur dals giasts.